‘हुप्रचौर’ आकर्षक र सुविधा सम्पन्न नमुना खुला क्षेत्र बन्दै 

हेटौंडा । हेटौँडा उपमहानगरपालिका–४ मा रहेको लोकतान्त्रिक चौर(हुप्रचौर)लाई सुविधा सम्पन्न र आकर्षक खुला क्षेत्रका रूपमा विकास गरिने भएको छ। करिब ३ करोड रुपैयाँको बजेट व्यवस्थापन गर्दै चौरलाई बागमती प्रदेशकै नमुना खुला चौरका रूपमा विकास गर्ने लक्ष्य राखिएको हेटौँडाकी नगर प्रमुख मीनाकुमारी लामाले जानकारी दिनुभयो।
उहाँका अनुसार ‘महिला मैत्री सहर निर्माण परियोजना’ अन्तर्गत चौरको मास्टर प्लान तयार गर्ने काम अन्तिम चरणमा पुगेको छ। मास्टर प्लान स्वीकृत भएसँगै निर्माण कार्यका लागि बोलपत्र आह्वान गरिनेछ। परियोजना तथा अन्य स्रोतबाट समेत बजेट व्यवस्थापन गरिने नगर प्रमुख लामाले बताउनुभयो।
वडा नं. ४ का अध्यक्ष नवीन सिग्देलका अनुसार चौरमा फुटबल, भलिबल र क्रिकेट मैदानलाई थप व्यवस्थित बनाइनेछ। साथै खुला जिम मर्मत तथा विस्तार, बालबालिकाका लागि खेल क्षेत्र, ज्येष्ठ नागरिकका लागि विशेष विश्रामस्थल, बस्ने तथा आराम गर्ने स्थान निर्माण गरिने योजना छ। चौरको गेट र मञ्चलाई पनि थप आकर्षक र सुविधाजनक बनाइने उहाँले जानकारी दिनुभयो।
यसअघि चौर क्षेत्रमा सार्वजनिक शौचालय, हिँड्ने ट्र्याक र भलिबल कोर्ट निर्माण भइसकेका छन् भने क्रिकेट केज निर्माण कार्य जारी रहेको छ। वडा कार्यालयको व्यवस्थापनमा नियमित सरसफाइ र मर्मत हुँदै आएको चौरमा हालै चार वटा हाईमास्ट बत्ती जडान गरी राति पनि उज्यालो बनाइएको छ।
चौरलाई महिला, बालबालिका, अपाङ्गता भएका व्यक्ति तथा खेलमैत्री बनाउनेतर्फ विशेष ध्यान दिइएको वडा अध्यक्ष सिग्देलले बताउनुभयो।