हेटौंडामा ठूलो परिमाणमा लागुऔषधसहित एक अटो चालक पक्राउ

मकवानपुर । मकवानपुरमा ठूलो परिमाणको लागुऔषधसहित एक अटो चालक पक्राउ परेका छन्। पक्राउ पर्नेमा चालक हेटौडा उपमहानगरपालिका–१३ बस्ने २७ वर्षीय सोनम मोक्तान रहेका प्रहरीले जनाएको छ।

राप्तिरोडबाट थानाभर्‍याङतर्फ गइरहेको बा प्र ०३–००१ ह ०१२६ नम्बरको अटो प्रहरी टोलीलाई देख्नेबित्तिकै भागेपछि शंका लागेर प्रहरीले पछ्याइ खोजतलास गरेको थियो।

मोक्तानको रितपूर्वक खानतलासी गर्दा अटोभित्र लुकाइ राखिएको अवस्थामा लागुऔषध ट्रामाडोलका १५ हजार ९६० क्याप्सुल फेला पारेका थिए। प्रहरीले लागुऔषध तथा अटो दुवै बरामद गरी मोक्तानलाई नियन्त्रणमा लिएको छ।

नियन्त्रणमा लिइएका मोक्तानविरुद्ध लागुऔषधसम्बन्धी मुद्दामा थप अनुसन्धान र कानूनी कारबाही अघि बढाइएको जिल्ला प्रहरी कार्यालय मकवानपुरले जनाएको छ।