हेटौंडा सडक विस्तारः जोखिमयुक्त घरटहरामा व्यापार नगर्न प्रशासनको आग्रह

मकवानपुर । जिल्ला प्रशासन कार्यालय मकवानपुरले हेटौंडा उपमहानगरपालिका क्षेत्रमा सडक विस्तारका क्रममा जोखिममा परेका घरटहरामा कुनै पनि किसिमको व्यापार व्यवसाय सञ्चालन नगर्न आग्रह गरेको छ।

हेटौंडा उपमहानगरपालिका अन्तर्गत रातोमाटेदेखि बुद्धचोक हुँदै राती पुलसम्म तथा बुद्धचोकदेखि सामरी पुलसम्म सडक विस्तारको कार्य भइरहेको छ। सो क्रममा सडक सीमाभित्र पर्ने घरटहराहरू भत्काइएका छन् भने केही संरचना जोखिमपूर्ण अवस्थामा रहेका छन्।

जिल्ला प्रशासन कार्यालयले सडक विस्तार कार्य हाललाई स्थगित रहेको स्पष्ट गर्दै अधिकांश घरधनीहरूले आफ्नै संरचना व्यवस्थापन गरिसके पनि केही व्यक्तिहरूले डोजर तथा एक्साभेटर प्रयोगका क्रममा जोखिममा परेका घरटहरामा व्यापार सञ्चालन गरिरहेको भन्दै यसले जनधनको क्षति हुन सक्ने चेतावनी दिएको छ।

प्रशासनले यस्ता भत्किएका तथा जोखिमयुक्त संरचनाभित्र कुनै पनि किसिमको व्यापार व्यवसाय सञ्चालन नगर्न, नगराउनुका साथै नागरिक र संरचना व्यवस्थापनमा संलग्न कामदारहरूको सुरक्षालाई उच्च प्राथमिकता दिन आग्रह गरेको छ।

जोखिमपूर्ण अवस्थामा व्यापार सञ्चालन गर्दा कुनै पनि प्रकारको दुर्घटना भएमा सम्बन्धित घरधनी तथा व्यवसायी स्वयं जिम्मेवार हुने पनि सूचनामा उल्लेख गरिएको छ। जिल्ला विपद् व्यवस्थापन समितिको मगंलबार बसेको बैठकको निर्णयअनुसार सार्वजनिक सूचना जारी गरिएको जिल्ला प्रशासन कार्यालयले जनाएको छ।