माघ महिनामा मात्रै १ सय ८७ किलोग्राम ७८४ ग्राम लागूऔषध गाँजा बरामद

मकवानपुर । जिल्ला प्रहरी कार्यालय मकवानपुरले लागूऔषध तस्करी विरुद्धको सक्रियता बढाउँदै माघ महिनामा मात्रै १ सय ८७ किलोग्राम ७८४ ग्राम लागूऔषध गाँजा बरामद गरेको छ । यो परिमाण पुस महिनाको तुलनामा ३४ किलोग्राम ४१४ ग्रामले बढी रहेको छ । गत पुस महिनामा मकवानपुर प्रहरीले १ सय ५३ किलोग्राम ३७० ग्राम गाँजा समातेको थियो ।

प्रहरीले माघ महिनामा जिल्लाका विभिन्न स्थानबाट गाँजाका अतिरिक्त १ सय २१ किलोग्राम ४६६ ग्राम चरेश, २ किलोग्राम अफिम, १७ ग्राम ३४० मिलीग्राम खैरो हिरोइन, ७५० वटा नाइट्राजेपाम र १७५ वटा ट्रमाडोल ट्याब्लेट बरामद गरेको छ । यसअघि पुस महिनामा मकवानपुर प्रहरीले २ ग्राम १२९ मिलीग्राम खैरो हिरोइन, २०० वटा नाइट्राजेपाम र ६९ वटा ट्रमाडोल ट्याब्लेट बरामद गरेको थियो ।

लागूऔषधको अवैध ओसारपसार र बिक्री वितरणमा संलग्न रहेको आरोपमा प्रहरीले माघ महिनामा एक बालिकासहित ३० जनालाई नियन्त्रणमा लिएर कानुनी कारबाही अगाडि बढाएको छ । यसैगरी, लागूऔषध ढुवानीमा प्रयोग गरिएका दुईवटा अटो, एउटा पिकअप, एउटा भारतीय कार र एउटा मोटरसाइकल गरी पाँचवटा सवारीसाधन समेत प्रहरीले बरामद गरेको छ । जिल्लाका विभिन्न स्थानमा प्रहरीले चेकजाँच र निगरानीमा कडाइ गरेपछि ठूलो परिमाणमा लागूऔषध र संलग्न व्यक्तिहरू पक्राउ परेका हुन् ।