कास्की कारागार : फर्किए चार सय कैदीबन्दी, तीन सय ६९ फरार

मकवानपुर । जेनजी आन्दोलनका क्रममा कास्की कारागारबाट निस्किएका ४७ प्रतिशत कैदीबन्दी अझै फर्किएका छैनन्। भदौ २४ गते साँझ कारागार खाली गरी बाहिरिएकामध्ये मङ्गलबारसम्म चार सय चार कैदी, बन्दी फर्किएका छन्।

सात सय ७३ कैदीबन्दी रहेकोमा अझै तीन सय ६९ जना फरार छन्। कास्की कारागारबाट फरार भएका केही कैदी, बन्दी राजधानी र आसपासका जिल्लाबाट पक्राउसमेत परेका थिए। कारागार प्रमुख राजेन्द्र शर्माले धेरैजसो कैदीबन्दी आफैं फर्किएको र फर्किने क्रम जारी रहेको जानकारी दिनुभयो।

“धेरैजसो आफैँ फर्किनुभएको छ, बाँकीलाई फर्किन कारागार व्यवस्था विभागले अनुरोध गरिसकेको हो,” उहाँले भन्नुभयो। कास्की कारागारमा महिलाका लागि एउटा र पुरुषका लागि दुई वटा ब्लक छन्। महिलाको ब्लकमा ३५ जना, पुरुषको ब्लकमा सात सय ३८ कैदीबन्दी बस्दै आएका थिए।

सम्पर्कमा नआएका कैदी, बन्दीको सूचना प्रहरीलाई दिएर जेल फर्काउने क्रम सुरु भएको शर्माको भनाइ छ। पोखरा–१९, ग्यारजातीमा रहेको बाल सुधार गृहमा रहेका बालक पनि फर्कनेक्रम जारी छ। त्यहाँ रहेको एक सय नौ बालकमध्ये मङ्गलबारसम्म ४८ जना फर्किएका छन्। सुधार गृह प्रमुख डासी पौडेलले आन्दोलनकारीले तोडफोड गर्न निस्किएका बालक अभिभावकहाँ पुगेर र सुधार गृह फर्किने क्रम जारी रहेको उल्लेख गर्नुभयो।

भदौ २४ गतेको आन्दोलनका क्रममा कास्कीका २७ प्रहरी संरचनामा क्ष्ति पुगेको थियो। त्यस क्रममा प्रहरी हिरासतसमेत खाली बनाई थुनुवा भागेका थिए।