नवरात्रमा कालिका भगवती मन्दिरमा विशेष पूजा

मकवानपुर । देशकै प्रसिद्ध धार्मिक शक्तिपीठ बागलुङ कालिका भगवती मन्दिरमा नवरात्रको पहिलो दिन घटस्थापना गरिएसँगै दसैँको विधिवत् सुरुवात भएको छ । नवरात्रभर बागलुङ कालिका मन्दिरमा हजारौं भक्तजन आएर पूजा गर्छन् । बागलुङ कालिका गुठी व्यवस्थापन समितिले भक्तजनलाई सहज पूजा गर्ने वातावरण मिलाएको छ ।

कालीका भगवतीको पूजा र दर्शन गर्दा आँटेताकेको पुग्ने, शक्ति प्राप्त हुने विश्वास छ । दसैँको अवसरमा विशेष पूजा हुने मन्दिरमा मनोकाङ्क्षा पूरा गर्न भक्तजनले पञ्चबलि दिने गरेका छन् । पूजाका लागि लाइन बस्ने, बलीलाई व्यवस्थित बनाउने, सहायता कक्ष, सूचना बोर्ड र प्रसाद वितरणको व्यवस्थापन गरिएको गुठीका अध्यक्ष कुमार खड्काले बताउनुभयो ।

मुक्तिनाथमा श्राद्ध गरेका भक्तजन फर्केर कालिका मन्दिर आएका छन् भने मुस्ताङ भ्रमणमा निस्केकाहरुले पनि कालिकाको दर्शन गरेको अध्यक्ष खड्काले जानकारी दिनुभयो । असोज लागेपछि देशका विभिन्न स्थानमा घुम्न निस्कने क्रममा कालिका मन्दिरमा धेरै भक्तजनहरु आउने गर्छन् । दसैँको बिदा सुरु भएकाले राजधानीसहित देशका विभिन्न सहरमा बसेका युवा तथा विद्यार्थी फर्कने क्रमले कालिका मन्दिरमा भक्तजनको बढ्दै गएको छ ।

पर्वतका राजा प्रतापी नारायण मल्लले पाल्पाका राजा मणि मुकुन्द सेनकी राजकुमारी विश्रवादेवीसँग विवाह गर्दा राजकुमारीले पाल्पा माझकी देवी कालिकालाई साथैमा ल्याएर विधिपूर्वक स्थापना गरेको किंवदन्ती अनुसार विसं १५९१ देखि मन्दिर स्थापना गरेर मेला र पूजा सुरु भएको पाइन्छ । अहिलेसम्म बागलुङ कालिकाबारे तीनवटा मात्र पुराना लेखोटहरु फेला परेका छन् । मन्दिरको भित्तामा १४ शक्तिका मूर्ति कुँदिएका छन् । प्यागोडा शैलीको मन्दिरमा तामाकै छानाले छाइएको छ ।