आगामी निर्वाचनका लागि हर्क साम्पाङको उम्मेदवारी घोषणा

काठमाडौं । सुनसरीको धरान उपमहानगरपालिकाका मेयर तथा श्रम संस्कृति पार्टीका अध्यक्ष हर्कराज राई (हर्क साम्पाङ) ले आगामी प्रतिनिधिसभा निर्वाचनमा सुनसरी क्षेत्र नं. १ बाट उम्मेदवारी दिने घोषणा गरेका छन् ।

बुधबार सामाजिक सञ्जाल फेसबुकमार्फत् उनले आफ्नो उम्मेदवारी घोषणा गरेका हुन् । ‘म सुनसरी क्षेत्र नं. १ बाटै प्रतिनिधि सभाको चुनाव लड्नेछु, जय माटो ! जय देश,’ उनले फेसबुकमा लेखेका छन् ।

श्रमदानको संस्कृतिको विकास गरेको दाबी गर्ने उनले श्रमदानबाट आफ्नो पालिकाको क्षेत्रमा काम गरेको बताउँदै आएका छन् ।

सामाजिक सञ्जालमार्फत् काठमाडौंका मेयर बालेन शाह, रास्वपा सभापति रवि लामिछानेप्रति कडा प्रतिक्रिया जनाउँदै आएका उनले पार्टी दर्ता गरेर आगामी निर्वाचनमा संसदीय राजनीतिमा प्रवेश गरेका हुन् ।