मकवानपुर र चितवनका चेपाङ समुदायका तीन जना समानुपातिक सूचीमा

मकवानपुर । प्रतिनिधि सभा सदस्य निर्वाचन २०८२ अन्तर्गत समानुपातिक प्रणालीतर्फ सीमान्तकृत चेपाङ समुदायका तीन जना उम्मेदवार विभिन्न राजनीतिक दलको बन्दसूचीमा समेटिएका छन्।

संविधान सभा सदस्य एवं नेपाल चेपाङ सङ्घका अध्यक्ष गोविन्दराम चेपाङका अनुसार मकवानपुरका एक र चितवनका दुई जना गरी तीन जना चेपाङ समुदायका व्यक्तिहरू प्रतिनिधि सभा सदस्यका लागि समानुपातिक सूचीमा परेका हुन्।

नेकपा (एमाले), नेपाली कम्युनिस्ट पार्टी (नेकपा) र नवगठित गतिशील लोकतान्त्रिक पार्टीले एक–एक जना चेपाङ समुदायका उम्मेदवारलाई बन्दसूचीमा राखेका छन्। नेकपाबाट मकवानपुरको साबिक हाँडीखोला गाविस, हाल मनहरी गाउँपालिका–३ सिद्धकालीका मङ्गलसिंह चेपाङ प्रतिनिधि सभा समानुपातिक सूचीमा समेटिनुभएको छ।

त्यस्तै एमालेबाट चितवनको कालिका नगरपालिका– शक्तिखोरका सन्तबहादुर चेपाङ सूचीमा पर्नुभएको छ भने गतिशील लोकतान्त्रिक पार्टीले चितवनको राप्ती नगरपालिका– कोराकका विश्वास चेपाङलाई समानुपातिक सूचीमा राखेको छ।

२०६४ सालको संविधान सभा निर्वाचनमा एमालेबाट मकवानपुरका गोविन्दराम चेपाङ र तत्कालीन माओवादीबाट गोरखाकी माया चेपाङ संविधान सभा सदस्य बन्नुभएको थियो। यसैगरी नेपाली कांग्रेसबाट मकवानपुरका सन्तबहादुर प्रजा प्रदेश सभा सदस्य हुँदै बागमती प्रदेश सरकारको भौतिक पूर्वाधार विकास राज्यमन्त्रीको जिम्मेवारीमा पुग्नुभएको थियो।