राष्ट्रिय सभा निर्वाचन: बागमतीका दुई सिटमा एमालेका दंगाल र कांग्रेसकी देवकोटा उम्मेदवार

मकवानपुर । आगामी माघ ११ गते हुने राष्ट्रिय सभा सदस्य निर्वाचनका लागि बागमती प्रदेशका दुई रिक्त सिटमा सत्ता गठबन्धनका तर्फबाट नेकपा (एमाले) का डा. प्रेमप्रसाद दंगाल र नेपाली कांग्रेसकी गीता देवकोटा उम्मेदवार बन्ने निश्चित भएको छ।

नेकपा (एमाले), नेपाली कांग्रेस र जनता समाजवादी पार्टी (जसपा) सम्मिलित सत्ता गठबन्धनबीच भएको सिट बाँडफाँड अनुसार बागमती प्रदेशका दुई सिटमध्ये एमाले र कांग्रेसले एक–एक सिटमा उम्मेदवार उठाएका हुन्।

देशभर रिक्त हुने १८ राष्ट्रिय सभा सिटमध्ये सहमति अनुसार कांग्रेसले ९, एमालेले ८ र जसपाले १ सिट पाउने सहमति भएको छ। माओवादी केन्द्र (हाल नेकपा) सत्ता गठबन्धनबाट बाहिरिएपछि सत्तारुढ दलहरूले नयाँ समीकरणअनुसार सिट बाँडफाँड गरेका हुन्। सोही अनुसार बागमती प्रदेशतर्फ एमालेबाट डा. दंगाल र कांग्रेसबाट देवकोटालाई उम्मेदवार बनाइएको हो।

नेपाली कांग्रेसले बागमती प्रदेशको महिला सिटमा चितवनकी गीता देवकोटालाई उम्मेदवार बनाएको छ। रत्ननगर नगरपालिका–१४ डुम्रीचोक निवासी ५१ वर्षीया देवकोटा विगत ३२ वर्षदेखि कांग्रेसको राजनीतिमा सक्रिय रहँदै आएकी छन्। हाल उनी कांग्रेस महासमिति सदस्य हुन् भने व्यावसायिक मौरीपालक कृषकसमेत हुन्। एकल महिला देवकोटाले नेविसंघ, तरुण दल र महिला संघमा विभिन्न जिम्मेवारी सम्हालिसकेकी छन्।

एमालेतर्फबाट उम्मेदवार बनेका डा. प्रेमप्रसाद दंगाल पार्टीका केन्द्रीय सदस्य हुन्। एमाले अध्यक्ष केपी शर्मा ओली निकट मानिने दंगाल यसअघि राष्ट्रिय योजना आयोगको सदस्य तथा २०७८ सालमा राष्ट्रिय किसान आयोगको अध्यक्ष भइसकेका छन्। उनी अखिल नेपाल किसान महासंघका केन्द्रीय अध्यक्ष र एसियाली किसान मञ्चका अध्यक्षसमेत रहेका छन्।

निर्वाचन आयोगको कार्यतालिका अनुसार बुधबार बिहान १० बजेदेखि दिउँसो ३ बजेसम्म उम्मेदवारी मनोनयन दर्ता गर्ने कार्यक्रम रहेको छ। सोही अनुसार दंगाल र देवकोटाले आजै हेटौंडास्थित निर्वाचन अधिकृतको कार्यालयमा पुगेर उम्मेदवारी दर्ता गराउने तयारी गरेका छन्।

निर्वाचन आयोगले पुस १९ गते मतदाता नामावली प्रकाशन गरिसकेको छ भने माघ ११ गते मतदान हुने कार्यतालिका रहेको छ।