सोनाम ल्होछारको अवसरमा मकवानपुरको राक्सिराङ्गमा दुई दिन सार्वजनिक बिदा

मकवानपुर । तामाङ समुदायको सांस्कृतिक पर्व मञ्जुश्री सम्वत् २८६२ (ता ल्हो, घोडा वर्ष) सोनाम ल्होछारको अवसरमा पश्चिम मकवानपुरको राक्सिराङ्ग गाउँपालिकाले दुई दिन सार्वजनिक बिदा दिने निर्णय गरेको छ।

गाउँपालिका अध्यक्ष राजकुमार मल्लले मंगलबार शुभकामना सन्देश जारी गर्दै माघ ४ र ५ गते गाउँपालिका भित्र सार्वजनिक बिदा रहने जानकारी गराएका छन्।

माघ ५ गते हर्षोल्लासपूर्वक मनाइने सोनाम ल्होछारले बहुभाषिक, बहुधार्मिक तथा बहुसांस्कृतिक राक्सिराङ्गमा आपसी सद्भाव, सामाजिक एकता र बन्धुत्वको भावना थप मजबुत बनाउने विश्वास अध्यक्ष मल्लले व्यक्त गरेका छन्।

तामाङ समुदायको बाहुल्यता रहेको राक्सिराङ्गमा पर्वलाई उल्लासमय रूपमा मनाउन सार्वजनिक बिदाको अवधिमा गाउँपालिका भित्रका सम्पूर्ण सरकारी कार्यालय, शिक्षण संस्था, सार्वजनिक संघसंस्था तथा बैंक तथा वित्तीय संस्थाहरू बन्द रहनेछन्।

अध्यक्ष मल्लका अनुसार राष्ट्रिय तथा स्थानीय सबै पर्वलाई सम्मानपूर्वक मनाउने उद्देश्यले गाउँपालिकाले नियमित रूपमा सार्वजनिक बिदा दिने नीति अवलम्बन गर्दै आएको छ।