मकवानपुर–२ मा महेश बर्तौलाको उम्मेदवारी : भन्छन्– फेरि जित्नेमा ढुक्क छु

मकवानपुर । मकवानपुर क्षेत्र नम्बर २ मा नेकपा एमालेका तर्फबाट महेश बर्तौलाले प्रतिनिधिसभा सदस्यका लागि उम्मेदवारी दर्ता गराएका छन्। निर्वाचन अधिकृतको कार्यालयमा पुगेर उम्मेदवारी दर्ता गराएपछि सञ्चारकर्मीहरूसँग कुरा गर्दै उनले आफ्नो जित निश्चित भएको दाबी गरे।

बर्तौलाले २०७९ सालको निर्वाचनमा जनताले पाँच वर्षका लागि म्यान्डेट दिएर पठाएको भए पनि पूरा कार्यकाल काम गर्न नपाएको गुनासो गरे। उनले ३२ महिना मात्रै काम गरेर असंवैधानिक तरिकाले संसद विघटन भएको बताए।

जनताको काम गर्न नपाउँदै संसद सकिए पनि अब ताजा जनादेशका लागि आफू जनताको घरदैलोमा जान लागेको उनको भनाइ छ। विधि र प्रक्रिया अनुसार निर्वाचन घोषणा भएको भन्दै उनले यसलाई लोकतान्त्रिक अभ्यासका रूपमा लिएको बताए।

आफू लोकतन्त्रलाई जीवन्त बनाउन स्वच्छ र मर्यादित प्रतिस्पर्धाको पक्षमा रहेको बर्तौलाले स्पष्ट पारे। कानुन निर्माण गर्ने थलोमा जानका लागि जनताले यसपटक पनि आफूलाई नै विश्वास गर्नेमा उनी ढुक्क देखिए। एमालेको तर्फबाट आफूले गरेको प्रस्तुति र विगतको भूमिकाका आधारमा जनताले भरोसा गर्ने उनको तर्क छ।

बर्तौलाले चुनावी मैदानमा उत्रिएका अन्य प्रतिस्पर्धी सहयोद्धालाई समेत शुभकामना दिएका छन्।