बागमतीमा रास्वपाको वर्चस्व ,३१ सिट आफ्नो पक्षमा

मकवानपुर । प्रतिनिधिसभा निर्वाचनअन्तर्गत बागमती प्रदेशका ३३ वटा निर्वाचन क्षेत्रमा आएको अन्तिम परिणामअनुसार राष्ट्रिय स्वतन्त्र पार्टी (रास्वपा) ले अभूतपूर्व जित हासिल गरेको छ। प्रदेशका ३३ मध्ये ३१ निर्वाचन क्षेत्रमा विजय हासिल गर्दै रास्वपाले बागमती प्रदेशमा स्पष्ट वर्चस्व कायम गरेको हो।

निर्वाचन परिणामअनुसार नेपाली कांग्रेस र नेकपाले भने एक–एक सिट मात्रै जितेका छन्। यता नेकपा एमाले भने बागमती प्रदेशमा पूर्ण रूपमा शून्यमा झरेको छ। अघिल्लो निर्वाचनमा उल्लेख्य उपस्थिति रहेको एमाले यस पटक भने बागमती प्रदेशका कुनै पनि निर्वाचन क्षेत्रमा विजय हासिल गर्न नसक्दा ठूलो धक्का लागेको विश्लेषण गरिएको छ।

निर्वाचन आयोगले सार्वजनिक गरेको परिणामअनुसार बागमती प्रदेशका अधिकांश जिल्लामा रास्वपाका उम्मेदवारहरूले फराकिलो मतान्तरका साथ विजय हासिल गरेका छन्। काठमाडौं उपत्यका, काभ्रे, सिन्धुपाल्चोक, मकवानपुर, धादिङ, नुवाकोट, रामेछापलगायतका जिल्लामा रास्वपाका उम्मेदवारहरूले परम्परागत दलहरूलाई पछाडि पार्दै जित हात पारेका हुन्।

राजनीतिक विश्लेषकहरूका अनुसार भ्रष्टाचार, सुशासन र नयाँ राजनीतिक विकल्पको मुद्दालाई प्राथमिकता दिँदै निर्वाचनमा गएको रास्वपाले मतदाताको व्यापक समर्थन प्राप्त गरेको देखिएको छ। विशेषगरी युवापुस्ताको आकर्षण र परम्परागत दलप्रतिको असन्तुष्टि रास्वपाको पक्षमा देखिएको विश्लेषण गरिएको छ।

यता नेपाली कांग्रेस र नेकपाले भने प्रदेशमा सीमित सफलता मात्रै प्राप्त गरेका छन्। कांग्रेसले एक निर्वाचन क्षेत्रमा जित निकाल्दा नेकपाले पनि एक क्षेत्रमा मात्र सफलता हात पारेको छ।

बागमती प्रदेशलाई राजनीतिक दृष्टिले देशकै सबैभन्दा महत्वपूर्ण प्रदेश मानिन्छ। संघीय राजधानी काठमाडौंसहितका प्रमुख शहरी क्षेत्र तथा रणनीतिक निर्वाचन क्षेत्रहरू समेटिएको यो प्रदेशमा आएको परिणामलाई राष्ट्रिय राजनीतिक सन्तुलनका दृष्टिले पनि अर्थपूर्ण रूपमा हेरिएको छ।

यस पटकको परिणामले बागमती प्रदेशमा राजनीतिक शक्ति सन्तुलनमा ठूलो परिवर्तन भएको संकेत गरेको छ। विशेषगरी नयाँ शक्तिका रूपमा उदाएको रास्वपाले परम्परागत दलहरूको वर्चस्व तोड्दै प्रदेशको राजनीतिक समीकरण नै फेरिदिएको विश्लेषण गरिएको छ।

निर्वाचन परिणाम सार्वजनिक भएसँगै अब संघीय संसदमा बागमती प्रदेशबाट जाने प्रतिनिधित्वमा पनि रास्वपाको प्रभाव अत्यधिक हुने देखिएको छ। राजनीतिक वृत्तमा यो परिणामलाई आगामी सरकार गठन, नीति निर्माण तथा राष्ट्रिय राजनीतिमा देखिने सम्भावित परिवर्तनसँग जोडेर पनि हेरिएको छ।