आधा सिलिन्डर नीति लागू भएपछि मकवानपुरमा ग्यास आपूर्ति सहज

मकवानपुर । मकवानपुरमा खाना पकाउने एलपी ग्यासको आपूर्ति क्रमशः सहज बन्दै गएको छ। बजारमा ग्यासको सहज उपलब्धता कायम राख्न आधा सिलिन्डर वितरण सुरु गरिएपछि आपूर्ति व्यवस्थापनमा थप सहजता आउने अपेक्षा गरिएको छ।

नेपाल आयल निगमको निर्णयअनुसार शुक्रबारदेखि ग्यासको बिक्री वितरणलाई व्यवस्थित बनाउन आधा सिलिन्डर प्रणाली लागू गरिएको हो। सो व्यवस्थापछि मकवानपुरका ग्यास डिलरहरूले पनि उपभोक्तालाई आधा सिलिन्डरका रूपमा ग्यास उपलब्ध गराउन थालेका छन्।

यसअघि उपभोक्ताहरूले पूरा सिलिन्डर खरिद गर्दै आएका भए पनि अहिले केही समयका लागि आधा सिलिन्डरका रूपमा ग्यास वितरण गरिँदा सबै उपभोक्तासम्म ग्यास पुग्ने विश्वास गरिएको छ।

जिल्लामा ग्यास आपूर्ति अवस्था बुझ्न जिल्ला प्रशासन कार्यालय मकवानपुरले पनि अनुगमनलाई तीव्र बनाएको छ। मकवानपुरका प्रमुख जिल्ला अधिकारी बसन्त अधिकारीका अनुसार जिल्लामा ग्यास भर्ने सहारा ग्यास कम्पनीसहित करिब १५ वटा ग्यास डिलरमा अनुगमन गरिएको छ।

प्रमुख जिल्ला अधिकारी अधिकारीले मकवानपुरमा ग्यास आपूर्तिमा कुनै समस्या नरहेको बताए। उनका अनुसार पहिले जति ग्यास आपूर्ति हुने गरेको थियो अहिले पनि त्यही परिमाणमा ग्यास निरन्तर रूपमा आइरहेको छ।

उनले भने, “जिल्लामा ग्यास आपूर्ति नियमित छ। बजारमा पर्याप्त ग्यास आइरहेको छ। आधा सिलिन्डर वितरणको व्यवस्था भएपछि सबै उपभोक्तासम्म ग्यास सहज रूपमा पुग्ने अपेक्षा गरिएको छ।”

स्थानीय व्यवसायीहरूका अनुसार बजारमा ग्यासको आपूर्ति सामान्य अवस्थामा रहेको छ। केही उपभोक्ताले आवश्यकभन्दा बढी सिलिन्डर घरमै राख्ने प्रवृत्तिले कहिलेकाहीँ अभाव भएको जस्तो देखिने अवस्था सिर्जना हुने गरेको उनीहरूको भनाइ छ।

मकवानपुरका ग्यास व्यवसायीहरूले पनि आधा सिलिन्डर प्रणालीले ग्यासको समान वितरणमा सहयोग पुग्ने बताएका छन्। यसले एकैपटक धेरै सिलिन्डर संकलन गर्ने प्रवृत्तिलाई नियन्त्रण गर्दै बढी उपभोक्तासम्म ग्यास पुर्‍याउन सहयोग पुग्ने उनीहरूको विश्वास छ।

जिल्ला प्रशासन कार्यालयले बजारमा ग्यासको आपूर्ति र वितरणलाई नियमित रूपमा अनुगमन गरिरहेको जनाएको छ। अनुगमनलाई निरन्तरता दिँदै उपभोक्तालाई सहज रूपमा ग्यास उपलब्ध गराउनेतर्फ सम्बन्धित निकाय सक्रिय रहेको प्रशासनले जनाएको छ।