२२ वर्षको यात्रामा नेपाल टेलिकम

मकवानपुर । नेपाल दुरसञ्चार कम्पनी लिमिटेड (नेपाल टेलिकम) २२ वर्ष पूरा गरी २३औँ वर्षमा प्रवेश गरेको छ ।

यस अवसरमा टेलिकमले आज विभिन्न कार्यक्रमका साथ २२औँ वार्षिकोत्सव मनाउँदैछ । २०६० सालदेखि कम्पनीमा परिणत भएको टेलिकम शुरूमा नेपाल दुरसञ्चार संस्थानका रुपमा रहे पनि कम्पनीमा परिणत भएपछि २३औँ वर्षमा प्रवेश गरेको हो ।

वार्षिकोत्सवमा टेलिकमले ग्राहक, नेपाल सरकार, नियामकीय निकाय, सञ्चालक समिति, शेयरधनी, व्यावसायिक साझेदार, कर्मचारी, शुभेच्छुकहरुमा आभार तथा कृतज्ञता व्यक्त गर्दै शुभकामना दिएको छ ।

टेलिकमले आउँदो दिनमा अत्याधुनिक प्राविधिमा आधारित गुणस्तरीय, सुरक्षित तथा विश्वसनीय दुरसञ्चार सेवा प्रदान गर्दै डिजिटल नेपाल निर्माणमा थप शसक्त योगदान गर्ने प्रतिवद्धता समेत व्यक्त गरेको छ ।