देउवासँगै आरजु र जयवीर नेपाल नआउने

काठमाडौं । नेपाली कांग्रेसका पूर्वसभापति शेरबहादुर देउवा एक्लै नेपाल फर्किने भएका छन् । हङकङबाट गत शुक्रबार थाइल्यान्डको राजधानी बैंकक पुगेका देउवा साउन २८ गते बिहीबार नेपाल फर्किन लागेका हुन् ।

उनीसँगै नेपालबाहिर रहेका पूर्वपरराष्ट्रमन्त्री एवं कांग्रेस नेतृ आरजु राणा देउवा र छोरा जयवीर देउवा भने नेपाल नआउने देउवानिकट स्रोतले जनाएको छ ।

यसअघि देउवा साउन २६ गते नै नेपाल फर्किने तयारीमा थिए । तर, समय व्यवस्थापनका कारण उनको नेपाल फर्किने मिति दुई दिनपछि सारिएको स्रोतको भनाइ छ ।

नेपाली कांग्रेसको असन्तुष्ट पक्षले साउन २९ देखि ३१ गतेसम्म काठमाडौंमा आयोजना गर्न लागेको भेलामा सहभागी हुन देउवा नेपाल फर्किन लागेका हुन् ।

कांग्रेसभित्र पछिल्लो समय बढेको आन्तरिक असन्तुष्टि र नेतृत्वप्रतिको बहसका बीच देउवाको नेपाल आगमनलाई चासोका साथ हेरिएको छ ।