पछिल्ला समय मकवानपुरमा साइबर अपराधका घटना वृद्धि

मकवानपुर । मकवानपुरमा पछिल्ला वर्षहरुमा साइबर अपराधका घटना वृद्धि हुँदै गएको छ । इन्टरनेटको प्रयोग गरेर हुने स्क्याम तथा अनलाइन ठगीको घटना बढ्दै गएको हो ।

अनलाइनबाट स्क्याम वा ठगी हुने क्रम बढेपछि प्रहरीमा उजुरी दिनेको संख्या पनि बढ्दै गएको जिल्ला प्रहरी कार्यालय मकवानपुरले जनाएको छ । चालु आर्थिक वर्ष २०८२/०८३ को पहिलो तीन महिनामा मात्रै अनलाइन ठगी वा स्क्याममा परेको भन्दै ५२ जनाले उजुरी दिएको जिल्ला प्रहरी कार्यालय मकवानपुरका प्रहरी नायव उपरीक्षक पुष्कर बोगटीले जानकारी दिनुभयो ।

गत आर्थिक वर्ष २०८१/०८२ मा २ सय २३ जनाले अनलाइन स्क्याम भएको भन्दै जिल्ला प्रहरी कार्यालय मकवानपुरमा उजुरी दिएका थिए । अघिल्लो आर्थिक वर्ष २०८०/०८१ मा अनलाइन ठगी बिरुद्ध ९४ जनाको मात्र प्रहरीमा उजुरी परेको प्रहरीको तथ्याङ्क छ । विशेषगरी इ–सेवा, अनलाइन बैकिङलगायतका अनलाइनबाट आर्थिक कारोबारमा स्क्याम हुने गरेको साइबर अपराधसम्बन्धी उजुरी आउने गरेको उहाँले बताउनुभयो ।

अनलाइनबाट किनमेल गर्दा पनि स्क्याम हुने गरेको प्रहरीले जनाएको छ । अनलाइन ठगीपछि पीडितको समस्या समाधान भने कमैको मात्र हुने गरेको छ । गत आर्थिक वर्ष २ सय २३ जनाले उजुरी गरेकोमा जम्मा २७ जना पीडितको मात्रै समस्या समाधान भएको पनि प्रहरीको तथ्याङ्क छ । चालु आर्थिक वर्षको साउनयता ५२ जनाले अनलाइन ठगीमा परेको भन्दै उजुरी दिएकोमा हालसम्म २ वटा उजुरीको मात्र टुंगो लागेको छ ।

जिल्ला प्रहरी कार्यालय मकवानपुरमा चालु आर्थिक वर्षको असोजसम्म फेसबुक ह्याक, फेक फेसबुक आइडी, टिकटकलगायतका सामाजिक सञ्जालसम्बन्धी अपराधबिरुद्ध २४ वटा उजुरी परेका छन् । गत आर्थिक वर्ष १ सय ७० वटा सामाजिक सञ्जालसम्बन्धी साइबर अपराधबिरुद्ध उजुरीहरु परेको कार्यालयले जनाएको छ । सामाजिक सञ्जालसम्बन्धी र अनलाइन आर्थिक कारोबार गर्दा हुनसक्ने जोखिमबारे प्रयोगकर्ताहरु अनविज्ञ भएकाले यस्ता अपराधहरु बढ्दै गएको प्रहरी नायव उपरीक्षक बोगटीले बताउनुभयो ।