हेटौंडामा संविधान दिवस : नागरिक अधिकार कार्यान्वयनमा मुख्यमन्त्री थापा मगरको जोड
हेटौंडा । बागमती प्रदेश सरकारले संविधान दिवस तथा राष्ट्रिय दिवस–२०८३ विविध कार्यक्रम आयोजना गरी मनाएको छ । दिवसका अवसरमा मुख्यमन्त्री तथा मन्त्रिपरिषद्को कार्यालय परिसरमा आयोजित समारोहमा उत्कृष्ट कार्य गर्नेहरूलाई पुरस्कार तथा सम्मान प्रदान गरिएको थियो ।
समारोहलाई सम्बोधन गर्दै बागमती प्रदेशका मुख्यमन्त्री किरण थापा मगरले संविधानमा उल्लेखित अधिकार नागरिकले व्यवहारमै अनुभूति गर्ने गरी कार्यान्वयन गर्नुपर्ने बताए ।
थापा मगरले संविधान नेपाली जनताको त्याग, समर्पण र बलिदानबाट प्राप्त ऐतिहासिक उपलब्धि भएको बताए । लोकतन्त्र, नागरिक स्वतन्त्रता र राष्ट्रिय हितका लागि आफ्नो जीवन समर्पण गर्ने सम्पूर्ण ज्ञात–अज्ञात व्यक्तित्वप्रति उहाँले सम्मान व्यक्त गरेका थिए ।
उनले संविधानले लोकतन्त्र, नागरिक स्वतन्त्रता, मानव अधिकार, प्रेस स्वतन्त्रता, विधिको शासन र समानताको आधारलाई संस्थागत गरेको बताए । संविधानले प्रत्येक नागरिकलाई शिक्षा, स्वास्थ्य, रोजगारी, सामाजिक सुरक्षा तथा न्यायमा समान पहुँचको अधिकार सुनिश्चित गरेको उनको भनाइ थियो ।
संविधान जारी भएपछि संघीय शासन प्रणाली संस्थागत भएको उल्लेख गर्दै मुख्यमन्त्री थापा मगरले प्रदेश सरकारले संघीयताको मर्मअनुसार नीति, कानून तथा योजनाहरू कार्यान्वयन गर्दै आएको बताए ।
संविधानको प्रभावकारी कार्यान्वयन नै यसको वास्तविक सफलता हुने उल्लेख गर्दै उहाँले नागरिकले सार्वजनिक सेवामा सहज स्वास्थ्य सेवा, सामाजिक सुरक्षामा प्रभावकारी पहुँच, न्याय र सुरक्षाको प्रत्याभूति पाउनुपर्ने बताएका छन् ।
युवाका लागि शिक्षा र रोजगारी, किसानका लागि उत्पादनको वातावरण तथा उद्यमीका लागि अनुकूल वातावरण निर्माण गर्नुपर्नेमा उनले जोड दिए ।
विकास आयोजनाको सुस्त प्रगति, बेरोजगारी, युवा पलायन, आर्थिक समस्या तथा राज्यप्रतिको नागरिक भरोसा कायम गर्नु अहिलेका चुनौती रहेको उल्लेख गर्दै मुख्यमन्त्री थापा मगरले संविधानको प्रभावकारी कार्यान्वयनमार्फत यस्ता चुनौती समाधान गर्नुपर्ने बताएका छन् ।
समारोहमा प्रदेश सरकारका मन्त्री, प्रदेशसभाका उपसभामुख, विभिन्न समितिका सभापति, प्रदेशसभा सदस्यहरु, प्रदेश सरकारका प्रमुख सचिव तथा सचिव, स्थानीय तहका प्रमुख तथा उपप्रमुख, सुरक्षा निकायका प्रमुख, राष्ट्रसेवक कर्मचारी, शिक्षक, विद्यार्थी तथा सञ्चारकर्मीलगायतको उपस्थिति थियो ।
मुख्य समाचार
लक्ष्मीपूजामा मुख्यमन्त्रीको सन्देश : नारी शक्तिको सम्मान गरौँ
मकवानपुर । तिहारलाई उज्यालो, उमङ्ग र धनधान्यकी देवी लक्ष्मीको पूजा आराधना गर्ने पर्वका रूपमा मनाइँदै गर्दा बागमती प्रदेशका मुख्यम...
पत्रकारिताको आलोचना लोकतन्त्रको सुन्दर पक्ष हो : प्रदेश प्रमुख देवकोटा
हेटौंडा । बागमती प्रदेशका प्रदेश प्रमुख दीपकप्रसाद देवकोटाले पत्रकारिताले गर...
तिहारको दोस्रो दिन आज कुकुरतिहार र लक्ष्मीपूजा गरिँदै
मकवानपुर । तिहारको दोस्रो दिन आइतबार कुकुरतिहार र लक्ष्मीपूजा एकै दिन मनाइँदै छ । तिथिको घटबढका कारण दिउँसो चतुर्दशी तिथि र सा...
खोलाभित्रै मेसिन प्रयोग गरेर सडक निर्माण, ऋद्धिसिद्धिबारे छानबिन गर्न स्थानीयको माग
हेटौंडा । मकवानपुरको मनहरी गाउँपालिका–७ स्थित रिभरसाइड क्षेत्रका स्थानीय बासिन्दाले ऋद्धिसिद्धि सिमेन्ट उद्योगको खानी सञ्चालन तथ...