नेप्से परिसूचक १९.४३ अङ्कले घट्यो

मकवानपुर । नेपाल स्टक एक्सचेन्ज (नेप्से) परिसूचकमा १९.४३ अङ्कको गिरावट आएको छ । साताको तेस्रो दिन (मङ्गलबार) बजार बन्द हुँदा नेप्से परिसूचक २५२८.१६ विन्दुमा अडिएको छ, जुन अघिल्लो दिनको तुलनामा ०.७६ प्रतिशतले कम हो ।

बजारमा आज कुल २१४ वटा कम्पनीको सेयर मूल्यमा गिरावट आएको छ भने ३३ वटा कम्पनीको मूल्य बढेको छ । ५ वटा कम्पनीको शेयर मूल्य भने स्थिर रहेको छ । आजको बजारमा कुल ३ अर्ब ३६ करोड ६१ लाख रुपैयाँ बराबरको कारोबार भएको छ । यस अवधिमा ७४ लाख ८८ हजार २७३ कित्ता सेयर ३८ हजार ६२७ वटा कारोबारमार्फत खरिद बिक्री भएका छन् ।

यो कारोबार रकम एक सातकदेखिको कम हो । पछिल्लो चार कारोबार दिनदेखि बजार निरन्तर घट्दै गएको देखिन्छ ।

मुख्य सूचकाङ्कसँगै अन्य उप–सूचकाङ्कहरूमा पनि गिरावट देखिएको छ। सेन्सेटिभ इन्डेक्स ४.६० अङ्कले घटेर ४३९.९४ मा पुगेको छ भने फ्लोट इन्डेक्स १.८० अङ्कले घटेर १७३.१३ मा झरेको छ। सेन्सेटिभ फ्लोट इन्डेक्स पनि १।७१ अङ्कले घटेर १४९.२८ मा कायम भएको छ ।

आज सर्वाधिक कारोबार हुने कम्पनीहरूमा नेपाल पुनर्बीमा कम्पनी, हिमालयन रिइन्यस्योरेन्स कम्पनी र सीईडीबी होल्डिङ कम्पनी अग्रस्थानमा रहेका छन् । आज मूल्य वृद्धि हुने कम्पनीहरूमध्ये शुभम् पावर र ग्रामीण विकास लघुवित्तको मूल्यमा १० प्रतिशत वृद्धिसहित सकारात्मक सर्किट लागेको छ । समाज लघुवित्तमा भने नकारात्मक सर्किट लागेको छ ।