सामाजिक सञ्जालको सदुपयोग अभियान सञ्चालन

मकवानपुर । इस्लामी सङ्घ नेपालले देशव्यापी रुपमा मोबाइल, इन्टरनेट र सामाजिक सञ्जालको सदुपयोगका लागि प्रेरित गर्न जागरण अभियान सञ्चालन गरेको छ ।

सोही क्रममा सङ्घले बाँकेमा पनि उक्त ६ दिने अभियान सञ्चालन गरेर मोबाइल, इन्टरनेट र सामाजिक सञ्जालको सदुपयोगमा जोड दिँदै दुरुपयोगबाट जोगिन विद्यार्थी र युवालाई विशेष अनुरोध गरेको छ। सो अभियान बारे जानकारी दिँदै इस्लामी सङ्घ नेपाल लुम्बिनी प्रदेश पश्चिमका अध्यक्ष उवेदुर रहमान खानले मोबाइल र सामाजिक सञ्जालको अत्यधिक, अनाबश्यक, अनियन्त्रित र अनुचित प्रयोगले समाजलाई एक्लोपन र नैतिक पतनको खाडलतर्फ धकेलिरहेकोेले यो अभियान चलाउनुपरेको बताउनुभयो ।

उहाँले विशेषगरी विद्यार्थी र युवाहरुमा त्यसको निकै लत देखिएकोले सो रोक्न अभियाननै चलाउनुपर्ने आवश्यकता महसुस गरेर जागरण अभियान थालिएको बताउनुभयो ।

अभियानका लागि बाँके र बर्दियामा आयोजना गरिने कार्यक्रमहरुको कार्यतालिका पनि सार्वजनिक गरिएको छ । सङ्घका लुम्बिनी प्रदेश सचिव बद्रे आलम खानले विद्यालय र मदरसालाई केन्द्रित गरी अभियान चलाइएको बताउनुभयो ।

उहाँले अहिलेको युग वैज्ञानिक प्रगति र डिजिटल क्रान्तिको युग भएको तथा मोबाइल फोन र सामाजिक सञ्जाल निःसन्देह ठूलो वरदान भए पनि यसको सही प्रयोग आवश्यक रहेको कुरामा जोड दिनुभयो।

नेपाल पत्रकार महासङ्घ लुम्बिनी प्रदेश अध्यक्ष शुक्रऋषि चौलागाई र बाँके शाखा अध्यक्ष नवीन गिरीले पत्रकार महासंघले कहिले पनि सामाजिक सञ्जालमा प्रतिबन्ध लगाउने कुराको समर्थन नगरेको जनाउँदै तर सामाजिक सञ्जालको दुरुपयोग हुन नदिन पनि सचेत र सतर्क रहनुपर्नेमा जोड दिँदै आएको बताउनुभयो ।

सङ्घले यसअघि पनि धेरै सामाजिक विकृतिविरुद्ध अभियान चलाएर विशेषगरी युवा पुस्तालाई सही मार्गमा डोर्‍याउने कार्य गरेको सो अवसरमा जानकारी गराइएको थियो।