रूस–युक्रेन शान्ति योजनामा नयाँ मोड

मकवानपुर । युक्रेनका राष्ट्रपति भोलोदिमिर जेलेन्स्कीले रूस र युक्रेनबीच लामो समयदेखि चलिरहेको युद्ध अन्त्य गर्ने उद्देश्यले तयार गरिएको नयाँ शान्ति योजनाको विवरण सार्वजनिक गर्नुभएको छ । अमेरिकासँग सहमत २० बुँदे योजनामा युक्रेनको पूर्वी क्षेत्रमा निःशस्त्रीकरण क्षेत्र वा आर्थिक क्षेत्र स्थापना गर्ने प्रस्ताव समावेश गरिएको छ ।

जसमा युक्रेनमाथि फेरि आक्रमण भएमा अमेरिका, नाटो तथा युरोपेली देशहरूबाट संयुक्त सुरक्षा प्रत्याभूति प्रदान गरिने उल्लेख छ । पूर्वी डोनबास क्षेत्रको सन्दर्भमा उहाँले युक्रेनी सेनाले केही दूरीसम्म भारी हतियार फिर्ता लिएर निःशस्त्रीकरण वा आर्थिक क्षेत्र बनाउन सकिने बताउनुभएको बीबीसीले जनाएको छ । रूसले डोनेत्स्क क्षेत्रको झन्डै एक चौथाइ भूभागबाट युक्रेनी सेना फिर्ता हुनुपर्ने अडान राख्दै आएको छ ।

तर युक्रेनले रूसले पनि बराबर दूरीसम्म आफ्ना फौज फिर्ता गर्नुपर्ने शर्त अघि सारेको छ । नयाँ योजनामा युक्रेनलाई शान्ति कालमा अधिकतम ८ लाख सैनिक बल राख्न अनुमति दिने, युक्रेनको सार्वभौमिकता पुनः पुष्टि गर्ने, र रूससँग गैर–आक्रमण सम्झौता गर्ने प्रस्ताव छ ।

साथै, अन्तर्राष्ट्रिय निगरानी संयन्त्रसहित सीमामा विदेशी बल परिचालन गर्ने विषय पनि उल्लेख गरिएको छ । जेलेन्स्कीले डोनबास र जापोरिज्जिया परमाणु विद्युत् केन्द्र वरपर आर्थिक क्षेत्र स्थापना गर्नुपर्ने र रूसले सुमी र खार्किभलगायत अन्य केही क्षेत्रबाट फौज फिर्ता गर्नुपर्ने माग राख्नु भएको छ ।

यस योजनामा युक्रेनलाई युरोपेली संघमा सदस्यता दिने स्पष्ट समयसीमा प्रस्ताव गरिएको छ भने झन्डै २०० अर्ब डलरको लगानी कोष स्थापना गर्ने योजना पनि समावेश छ । यस विषयमा रूसको प्रतिक्रिया आउन बाँकी रहेको खबरमा उल्लेख छ ।