आज मौसम बदली, भोलि मतदानका दिन आकाश खुल्ने

काठमाण्डौं । आज तराईमा हुस्सु लागेको छ । त्यस्तै काठमाण्डौ उपत्यका सहित पहाडी क्षेत्रमा बादल छ । अहिले नेपालमा उपल्लो वायुमण्डलमा रहेको उच्च चापीय प्रणालीको प्रभाव रहेको जल तथा मौसम पूर्वानुमान महाशाखाले जनाएको छ ।

कोशी, बागमती र गण्डकी प्रदेशका पहाडी तथा हिमाली भागमा आंशिक बादल लागेको र ती क्षेत्रसहित बाँकी भागमा तुवाँलो पनि लागेको मौसम पूर्वानुमान महाशाखाले जनाएको छ । तराईका केही ठाउँमा आज दिउँसोसम्म हुस्सु कायम रहनेछ । कोशी, बागमती र गण्डकी प्रदेशका पहाडी र हिमाली भागमा आंशिक बादल लाग्नेछ र बाँकी भूभागमा मौसम मुख्यतया सफा रहने महाशाखाले जनाएको छ ।

आज राति तराईका केही ठाउँमा तुँवालो रहनेछ । त्यस्तै कोशी र गण्डकी प्रदेशको पहाडी र हिमाली भागमा आंशिक बादल लाग्नेछ र बाँकी भूभागमा मौसम मुख्यतया सफा रहनेछ । मतदानको दिन भोलि देशका धेरै ठाउँको मौसम सफा रहने महाशाखाले जनाएको छ ।

भोलि पानी पर्ने सम्भावना छैन । मौसमविद् हरिप्रसाद दाहालका अनुसार उच्च क्षेत्रमा सामान्य हिमपातबाहेक मतदानलाई मौसमले उल्लेखनिय प्रभाव पार्ने अवस्था छैन । भोलि बिहीवार र शनिवार गण्डकी, बागमती र कोशी प्रदेशका एकरदुई ठाउँमा हल्का बादल लाग्न सक्छ ।

वरिष्ठ मौसमविद् वरुण पौडेलका अनुसार गर्मीयाम शुरु हुँदै जाँदा दिउँसो तापक्रम बढ्ने र बेलुकातिर पहाडी क्षेत्रमा बादल विकसित भई छिटपुट वर्षा हुने मौसमी प्रवृत्ति देखिनसक्ने भएपनि यो हप्ता पानी पर्ने कुनै सम्भावना छैन । उहाँले पनि मतदान प्रक्रियामा मौसमले कुनै असर नपर्ने बताउनुभयो ।