काठमाडौंका स्वयम्भू र बालाजु क्षेत्रमा संरचना भत्काउने कार्य सुरु

काठमाण्डौं । सरकारले अतिक्रमित क्षेत्रका संरचना तथा घरटहरा हटाउने अभियानलाई आज पनि निरन्तरता दिएको छ ।

अभियानको दोस्रो चरण अन्तर्गत आज बिहान स्वयम्भू, बालाजु र माछापोखरी आसपासका नदी किनार र अतिक्रमित जग्गामा बनेका संरचनामा डोजर चलाइएको छ । यसअघि हिजो बल्खु, वंशीघाट, गोंगबुलगायतमा विभिन्न ठाउँमा डोजर चलाएर खाली गरिएको थियो ।

संघीय मामिला तथा सामान्य प्रशासन मन्त्रालयले अस्ति बिहीबार देशभरका सबै पालिकालाई पत्र लेख्दै पहिला सुकुम्वासी पहिचान, व्यवस्थापन अनि मात्र अतिक्रमण हटाउन निर्देशन दिएको थियो । तर काठमाण्डौमा अभियान निरन्तर छ ।

यसअघि अभियानको पहिलो चरणमा थापाथली, सिनामङ्गल–गैरीगाउँ, शान्तिनगर र मनोहरा क्षेत्रका बस्ती खाली गरेर त्यहाँ बसोबास गर्दै आएका नागरिकलाई स्थानान्तरण गरिएको छ ।