रास्वपाको पहिलो महाधिवेशन चितवनमा शुरू

काठमाण्डौं । राष्ट्रिय स्वतन्त्र पार्टी (रास्वपा) को पहिलो महाधिवेशन चितवनमा शुरू भएको छ । रास्वपा सभापति रवि लामिछाने र प्रधानमन्त्री एवम् वरिष्ठ नेता बालेन्द्र शाहले घण्टी बजाएर संयुक्त रूपमा महाधिवेशनको उद्घाटन गर्नुभएको हो ।

उद्घाटन समारोहमा नेपाली कांग्रेसका सभापति गगन थापा, नेकपा एमालेबाट नेता प्रदीप ज्ञवाली, नेकपाबाट नेता वर्षमान पुन र राप्रपाबाट अध्यक्ष राजेन्द्र लिङ्देन सहभागी सहभागी हुनुभएको छ । यस्तै पूर्वप्रधानमन्त्री डा। बाबुराम भटराई पनि उद्घाटन समारोहमा सहभागी बन्नुभएको छ ।

स्थापनाको ४ वर्षमै झन्डै दुई तिहाइ बहुमतका साथ सत्ताको नेतृत्व गर्ने जनमत पाएको रास्वपाको नीति र नेतृत्व परिष्कृत गर्ने महाधिवेशन भएकोले यसलाई महत्त्वका साथ हेरिएको छ ।

पार्टीका महामन्त्री कविन्द्र बुर्लाकोटीका अनुसार नीतिमा पार्टीको सङ्गठनात्मक र वैचारिक प्रतिवेदन प्रस्तुत हुन्छ । अनुशासन आयोगको प्रतिवेदन र पार्टी सभापतिको राजनीतिक प्रतिवेदनमा छलफल भएर नीति निखारको काम हुन्छ । तीन दिने महाधिवेशनले पार्टीको अहिलेको तदर्थ केन्द्रीय समितिबाट निर्वाचित केन्द्रीय समिति बनाउनेछ । यस महाधिवेशनपछि पार्टी एक तहमा परिपक्व भएको ठहर्ने छ ।

महाधिवेशनमा ४ हजार २०० जनाभन्दा धेरै प्रतिनिधि सहभागी हुने रास्वपाले जनाएको छ । महाधिवेशनमा गर्न लागिएको प्रस्तावमा केन्द्रीय समितिमा १५१ जना निर्वाचित हुने र ७ जना प्रदेश सभापति पदेन सदस्य हुने उल्लेख छ ।

महाधिवेशनमा २ चरणको मतदान प्रक्रिया हुनेछ । पहिलो चरणमा सभापति र केन्द्रीय सदस्यहरू चयन हुने तथा दोस्रो चरणमा निर्वाचित केन्द्रीय सदस्यहरूमध्येबाट पदाधिकारी चुनाव हुने रास्वपाका केन्द्रीय निर्वाचन आयोगका प्रमुख भुवन केसीले जानकारी दिनुभयो । उहाँका अनुसार मतदानका लागि ८० वटा विद्युतीय मेशिन प्रयोग गरिनेछ र देशबाहिर रहेका रास्वपाका प्रतिनिधिहरूले मोबाइल एपमा मतदान गर्न पाउनेछन् । भोलिदेखि चुनावको प्रक्रिया शुरू भएर पर्सि मतदान हुनेछ ।