मकवानपुरमा साइड दिने क्रममा डिब्बा ट्रक दुर्घटना, चालक घाइते

हेटौंडा । मकवानपुरको भीमफेदी गाउँपालिका–२ चुनियास्थित त्रिभुवन राजमार्गमा डिब्बा ट्रक दुर्घटना हुँदा चालक घाइते भएका छन्।

प्रहरीका अनुसार वीरगञ्जबाट काठमाडौंतर्फ मेसिनरी सामान बोकेर जाँदै गरेको म प्र ०३–००२ ख ४७०५ नम्बरको डिब्बा ट्रक विपरीत दिशाबाट अर्थात् पालुङतर्फबाट हेटौंडा आउँदै गरेको नम्बर नखुलेको ट्रकले साइड च्याप्दै आएपछि साइड दिने क्रममा दुर्घटनामा परेको हो।

साइड दिने क्रममा डिब्बा ट्रकको पछाडिको चक्का सडकको किनार भासिएपछि ट्रक करिब २०–२५ मिटर तल खसेर बाँसको झ्याङमा अड्किएको प्रहरीले जनाएको छ।

दुर्घटनामा ट्रक चालक हेटौंडा उपमहानगरपालिका–१४ निवासी करिब ४३ वर्षीय सुब्बा स्याङतान घाइते भएका छन्। उनको ढाड–कम्मरमा भित्री चोट तथा बायाँ खुट्टामा चोट लागेको छ। घाइतेलाई राति ११:३० बजे हेटौंडा अस्पताल पुर्‍याई उपचार गरिएको थियो।

घटनाको जानकारी प्राप्त हुनासाथ प्रहरी चौकी भैंसेबाट प्रहरी र ट्राफिक प्रहरीको टोली घटनास्थलमा पुगेको थियो। दुर्घटनामा ट्रकमा क्षति पुगेको प्रहरीले जनाएको छ।