आज नुवाकोट र रसुवामा बाढीको उच्च जोखिम

काठमाण्डौ। आज ३३ जिल्लामा बाढीको जोखिम छ । बाढी पूर्वानुमान महाशाखाका अनुसार नुवाकोट र र रसुवा जिल्ला बाढीको उच्च जोखिममा छन् ।

यस्तै पाँचथर, तेह्रथुम, ताप्लेजुङ, संखुवासभा, सोलुखुम्बु, ओखलढुंगा, रामेछाप, दोलखा, सिन्धुली, सिन्धुपाल्चोक, काभ्रेपलाञ्चोक, ललितपुर, भक्तपुर, काठमाण्डौ, धादिङ र मकवानपुरमा बाढीको मध्यम जोखिम छ ।

गोरखा, लमजुङ, तनहुँ, स्याङ्जा, कास्की, पर्वत, म्याग्दी, बागलुङ, गुल्मी र बर्दिया तथा कैलाली, दार्चुला, बैतडी, डडेल्धुरा र कञ्चनपुर पनि बाढीको जोखिममा रहेका महाशाखाले जनाएको छ ।

भोटेकोशी र त्रिशूली नदीमा अहिले बहाव उच्च रहेको छ । विशेषगरी त्रिशूली नदीको बेत्रावती क्षेत्रमा अबको तीन दिन नै जल सतह उल्लेख्य रूपमा बढ्ने पूर्वानुमान गरिएको छ । त्यसैगरी नारायणी नदीको देवघाट, बूढीगण्डकीको आरुघाट र मस्र्याङ्दी नदीको विमलनेर क्षेत्रमा आज जल सतह उल्लेख्य बढ्ने सम्भावना रहेको छ ।

अरु प्रमुख नदीहरूमा पनि जल सतह बढ्ने पूर्वानुमान गरिएको छ । नदी तथा खोलानालाको आसपास र बाढीको जोखिम रहेका क्षेत्रमा बसोबास गर्ने नागरिकलाई सतर्क रहन, नदीको बहाव बढेको अवस्थामा तटीय क्षेत्रमा नजान तथा आवश्यक परे सुरक्षित ठाउँतर्फ सर्न महाशाखाको आग्रह छ ।

लगातारको वर्षाका कारण पहाडी क्षेत्रमा पहिरो र आकस्मिक बाढीको जोखिमसमेत बढ्न सक्ने भएकाले सडक यात्रा गर्दा पनि विशेष सावधानी अपनाउन महाशाखाले आग्रह गरेको छ ।