भोटेकोशी बाढी : हेटौंडाका दुईसहित ९ जनाको शव पहिचान

हेटौंडा । भोटेकोशीमा आएको भीषण बाढीमा परेका १६८ जनाको शव पूर्वी नवलपरासीमा फेला परेको छ। फेला परेका शवमध्ये हालसम्म ९ जनाको मात्रै पहिचान भएको गण्डकी प्रदेश प्रहरी कार्यालयका एसपी रमेश पण्डितले जानकारी दिएका छन्।

पहिचान भएका मृतकमध्ये मकवानपुरको हेटौंडा उपमहानगरपालिका–५ का उद्धव खड्का र हेटौंडा–१५ का सुमन गोले रहेका छन्। हेटौंडाका दुई जनाको शव पहिचान भएसँगै परिवारलाई जिम्मा लगाउने प्रक्रिया अघि बढाइएको प्रहरीले जनाएको छ।

त्यस्तै, नवलपरासी पश्चिमको सुस्ता गाउँपालिका–१ का यादव भण्डारी, धादिङको खनियाबासका संयोग घर्तीमगर, अर्घाखाँचीको पाणिनी गाउँपालिका–७ का नारायणबहादुर थापा, नुवाकोटको विदुर नगरपालिका–७ की शारदा ढकाल, गोरखाको पालुङटार नगरपालिका–५ की कमला देवकोटा, चितवनको माडी नगरपालिका–७ का विमल काफ्ले तथा गोरखाकी सुजाता कोइरालाको शव पनि पहिचान भएको छ।

नारायणी नदी किनारमा थप ५२ वटा मानव अंग फेला परेका छन्। शव व्यवस्थापनमा कठिनाइ भएपछि स्थानीय प्रशासनले ट्याग लगाएर शव व्यवस्थापन गरिरहेको जनाएको छ।