बाढीले अवरुद्ध खोटाङको दिक्तेल–चखेवाभञ्ज्याङ सडक सञ्चालन

काठमाण्डौं । बाढीका कारण अवरुद्ध भएको खोटाङको दिक्तेल–चखेवाभञ्ज्याङ सडक सञ्चालनमा आएको छ । दिक्तेल रुपाकोट मझुवागढी नगरपालिका–८ बुवालुङ पङ्खुखोलामा आएको बाढीले सडक अवरुद्ध थियो ।

मध्य पहाडी लोकमार्गमा पर्ने दिक्तेल–चखेवाभञ्ज्याङ सडकमा अस्ति शुक्रबार वर्षापछि बाढी आएको थियो । पङ्ख खोलाभन्दा माथिबाट आएको लेदोसहितको बाढीले झण्डै २५ मिटर सडक बिग्रेको थियो । अवरुद्ध सडक दिक्तेल रुपाकोट मझुवागढी नगरपालिका, नेपाली सेनाको रणभीम गण मुडे ब्यारेक, जिल्ला प्रहरी कार्यालय खोटाङ र स्थानीयवासीको पहलमा खुलेको हो ।

सडक खुलेपछि भोजपुरबाट दिक्तेल हुँदै काठमाण्डौ र काठमाण्डौबाट दिक्तेल हुँदै भोजपुरतर्फ जाने गाडी चल्न थालेका जिल्ला प्रहरी कार्यालय खोटाङका सूचना अधिकारी एवं प्रहरी निरीक्षक निराजन बस्नेतले जानकारी दिनुभयो ।

पङ्खुखोलामा २०७३ सालमै मोटरेबल पक्की पुल निर्माण गरेर सञ्चालनमा ल्याउने गरी निर्माण कम्पनीले काम थालेको थियो । तर ठेकेदारको लापरबाहीका कारण पुल निर्माण नहुँदा खोलाबाटै वारपार गर्नुपर्ने बाध्यता छ ।