परालको टौवामा उम्रिएको च्याउ खाँदा एकै परिवारका चार जना बिरामी

मकवानपुर । परालको टौवामा उम्रिएको च्याउको तरकारी खाँदा गोरखामा एकै परिवारका चार जना बिरामी परेका छन्।

मकवानपुरको बागमती गाउँपालिका–१३ घर भई हाल गोरखा नगरपालिका–१४ प्युघरमा डेरा गरी बस्दै आएकी ३० वर्षीया हीरा पहरी र उनका तीन सन्तान विषालु च्याउ सेवनपछि बिरामी परेको जिल्ला प्रहरी कार्यालय गोरखाले जनाएको छ।

प्रहरीका अनुसार सोमबार साँझ घर नजिकै रहेको परालको टौवामा उम्रिएको च्याउ टिपेर तरकारी बनाएर खाएपछि हीरा पहरी, उनका १२ वर्षीय छोरा किसान, ६ वर्षीय छोरा हिमाल र ५ वर्षीया छोरी सुजिता बिरामी परेका हुन्।

च्याउ खाएलगत्तै उनीहरूमा पेट दुख्ने, वाकवाकी लाग्ने र अत्यधिक थकानजस्ता लक्षण देखिएपछि तत्काल उपचारका लागि तनहुँको आबुखैरेनी गाउँपालिका अस्पताल लगिएको थियो। हाल उनीहरूको सोही अस्पतालमा उपचार भइरहेको छ।

प्रहरीका अनुसार सबै बिरामी बोल्न सक्ने अवस्थामा छन् र स्वास्थ्य अवस्था सामान्यतर्फ उन्मुख रहेको छ। घटनाको थप अनुसन्धान भइरहेको जिल्ला प्रहरी कार्यालय गोरखाले जनाएको छ।