मकवानपुरका पत्रकारलाई अब निःशुल्क उपचार सुविधा

मकवानपुर । नेपाल पत्रकार महासंघ मकवानपुरमा आबद्ध सबै सदस्यहरूको निःशुल्क उपचार हुने भएको छ । नेपाल पत्रकार महासंघ मकवानपुर र सुनौलो भविष्य सहकारी संस्था लिमिटेडद्वारा सञ्चालित हेटौँडा–१ मा रहेको सहकारी अस्पतालबिच शनिबार तीन वर्षका लागि पत्रकारहरूको स्वास्थ्य परीक्षण तथा उपचार निःशुल्क गर्ने सम्झौता भएको हो । नेपाल पत्रकार महासंघ मकवानपुरका अध्यक्ष बालकृष्ण शर्मा अधिकारी र सहकारी अस्पतालका प्रतिनिधि नरोत्तम दाहालबिच सम्झौता पत्रमा हस्ताक्षर भएको छ ।

सहकारी अस्पतालले सामाजिक उत्तरदायित्व वहनअन्तर्गत पत्रकार महासंघ मकवानपुरमा सदस्य र सदस्य बन्ने क्रममा रहेका सक्रिय पत्रकारहरूलाई स्वास्थ्य सेवा पहुँचमा सहजता प्रदान गर्ने उल्लेख छ । सम्झौतामा सम्पूर्ण ओपिडी सेवा निःशुल्क हुने, शल्यक्रिया तथा भर्ना भई उपचार गर्दा निःशुल्क गरिने, ल्याब सेवा निःशुल्क, रेडियोलोजी सेवा र अन्य परीक्षणसम्बन्धी अस्पतालमा उपलब्ध सेवा निःशुल्क हुने उल्लेख छ ।

त्यस्तै औषधीमा १० प्रतिशत छुट पनि प्राप्त हुने दुवै पक्षबिच भएको सम्झौतामा उल्लेख छ । सेवा लिनका लागि नेपाल पत्रकार महासंघले जारी गरेको सदस्यता प्रमाणपत्र अनिवार्य आवश्यक रहेको छ । स्वास्थ्य उपचार सम्झौतासँगै नेपालीहरूको महान् चाडपर्व अवसरमा शुभकामना आदानप्रदान कार्यक्रम समेत गरिएको थियो ।

नेपाल पत्रकार महासंघ बागमती प्रदेश अध्यक्ष कृष्ण सारू मगर, नेपाल पत्रकार महासंघ मकवानपुरका अध्यक्ष बालकृष्ण शर्मा अधिकारी लगायतकाले मन्तव्य राख्नुभएको कार्यक्रममा सहकारी अस्पतालका प्रतिनिधिहरू, पत्रकार महासंघ मकवानपुरका पूर्व अध्यक्ष तथा पत्रकार निकट सङ्गठनहरूका प्रतिनिधिसहित पत्रकारहरूको सहभागिता रहेको थियो । कार्यक्रम महासंघ जिल्ला सचिव केशव समर्पण सुवेदीले सञ्चालन गर्नुभएको थियो ।