आज विश्वकप क्रिकेट लिग–टु शृङ्खलामा युएई र ओमान खेल्दै

काठमाण्डौं ।आईसीसी विश्वकप क्रिकेट लिग–टु एकदिवसीय शृङ्खलामा आज युएई र ओमानले खेल्दैछन् ।

खेल त्रिवि क्रिकेट रङ्गशालामा बिहान साढे ९ बजेदेखि शुरु हुनेछ । तर बिहान परेको पानी र मौसम बदलीकै अवस्था रहेकाले आजको खेल प्रभावित हुनसक्ने सम्भावना छ ।

काठमाण्डौमा चलिरहेको शृङ्खलामा ओमानले यसअघि खेलेका २ खेलमा एक जीत र एक हार बेहोरेको छ । युएईले खेलेका ३ खेलमा २ हार र १ जीत निकालेको छ । युएई नेपालसँगको दुवै खेलमा पराजित हुँदा ओमानलाई हराएको थियो ।

यो शृङ्खलामा नेपाल, युएई र ओमान छन् । लिग–टु शृङ्खलामा आठ वटा देश छन् । अमेरिका २४ खेलमा ३६ अङ्कसहित शीर्ष, स्कटल्याण्ड २८ खेलमा ३४ अङ्कसहित दोस्रो, ओमान २६ खेलमा ३१ अङ्कसहित तालिकाको तेस्रो, नेदरल्याण्डस् २४ खेलमा २८ अङ्कसहित चौथो, नामिबिया २८ खेलमा २२ अङ्कसहित पाँचौँ, क्यानडा २४ खेलमा २१ अङ्कसहित छैटौँ, नेपाल २३ खेलमा १६ अङ्कसहित सातौँ र युएई २३ खेलमा १२ अङ्कसहित पुछारमा छ ।