नवलपरासी दाउन्ने खण्डको ढलान कम्तीमा ३० वर्षसम्म टिक्ने दाबी

काठमाण्डौं । पूर्व–पश्चिम राजमार्ग अन्तर्गत दाउन्ने खण्डको सडक निर्माण कार्य अन्तिम चरणमा पुगेको छ ।

यो खण्डमा गरिएको ढलान (कङ्क्रिटिङ) को आयु कम्तीमा ३० वर्ष हुने आयोजनाले दाबी गरेको छ । सडक विभाग आयोजना निर्देशनालय (एडीबी) का आयोजना निर्देशक चुडाराज ढकालका अनुसार दाउन्नेको भौगोलिक अवस्था र गाडीको चापलाई मध्यनजर गरी कालोपत्रेको सट्टा गुणस्तरीय ढलान गरिएको हो ।

३० वर्षको आयु सुनिश्चित हुनेगरी ढलान गरेको, भार नियन्त्रण हुन सकेमा अनि डिजाइन अनुसारका अन्य मापदण्ड पालना भए ४० वर्षसम्मै ढलान टिक्ने उहाँको दाबी छ । जसले नागरिकले दाउन्नेमा भोग्दै आएको सास्ती अन्त्य हुने ढकालको विश्वास छ । उहाँले सडकको भारवहन क्षमता एकल चक्कामा १० टन रहेको जानकारी दिनुभयो ।

आउँदो २० देखि ३० वर्षको गाडीको चापको पूर्वानुमानलाई आधार मानेर दैनिक १२ देखि २० हजार गाडी आवतजावत गर्दा पनि सडकमा कुनै क्षति नपुग्ने गरी निर्माण गरिएको उहाँको भनाइ छ । अहिले दाउन्ने मन्दिर मुनिको पहिरो प्रभावित क्षेत्रमा झण्डै ५० मिटर एकतर्फी ढलान गर्न मात्र बाँकी छ ।
कालोपत्रे गर्दा सडक छिटो बिग्रने र सर्वसाधारणले निरन्तर सास्ती खेप्नुपर्ने अवस्थालाई दृष्टिगत गर्दै आयोजनाले ढलानको विकल्प रोजेको हो । यससँगै दाउन्ने खण्डमा बर्सेनि हुने सडक अवरोध र मर्मतको समस्या दीर्घकालीन रूपमा समाधान हुने सरकारको विश्वास छ ।