लमजुङमा ४७ जनामा डेंगु संक्रमण पुष्टि

मकवानपुर । लमजुङमा डेंगु संक्रमणको जोखिम बढ्दै गएको छ । असोज २२ गतेसम्म जिल्लामा ४७ जना डेङ्गु संक्रमित भएका छन् ।

बेसीसहरस्थित प्रदेश अस्पतालसहित जिल्लाका विभिन्न स्थानीय तहहरुमा रहेका स्वास्थ्य केन्द्रहरुमा लामखुट्टेको टोकाइबाट सर्ने डेङ्गुका बिरामी उपचारका लागि आउनेको संख्या बढ्दै गएको छ ।

प्रदेश जनस्वास्थ्य कार्यालय लमजुङका अनुसार असोज १ गतेदेखि २२ गतेसम्म जिल्लामा ४७ जनामा डेङ्गु संक्रमण पुष्टि भएको पाइएको छ । सदरमुकाम बेसीशहरमा मात्रै असोज महिनामा २५ जना डेङ्गुका विरामी अस्पताल पुगेको प्रदेश जनस्वास्थ्य कार्यलय लमजुङका प्रमुख प्रविण कुमार खनालले बताउनुभयो । त्यस्तै सुन्दरबजारमा १४ जना, राइनासमा ४ जना र मध्यनेपालमा ४ जना डेङ्गु संक्रमित भेटिएको जनस्वास्थ्य कार्यलयले लमजुङले जनाएको छ ।

सदरमुकाम बेसीसहरसहित जिल्लाका विभिन्न भागमा डेंगु संक्रमणको जोखिम बढ्दै गएपछि चिकित्सकहरुले सतर्कता अपनाउन आग्रह गरेका छन् । जिल्लामा गत साउन र भदौ महिनामा मात्रै ९३ जनामा डेङ्गु संक्रमण पुष्टि भएको थियो । सो अबधिमा बेसीशहरका मात्रै ३० जनामा डेङ्गु संक्रमण पुष्टि भएको कार्यलयको तथ्याङ्क छ ।

सो अवधिमा राईनास नगरपालिकामा १७ जना, मस्र्याङदी गाउँपालिकामा ११ जना, दोर्दी गाउँपालिकामा आठजना, मध्यनेपाल, दुधपोखरी र क्होलासोँथारमा एकएक जनामा डेङ्गु संक्रमण देखिएको थियो । त्यसैगरी जिल्ला बाहिरका आठजना पनि डेङ्गु संक्रमण भएर स्वास्थ्य संस्थामा उपचार गर्न आएको स्वास्थ्य कार्यालय लमजुङले जनाएको छ ।

एडिस एजेप्टाई नामको संक्रमित पोथी लामखुट्टेले टोकेमा मानिसलाई डेङ्गु रोग सर्ने स्वास्थ्यकर्मीहरुले बताएका छन् । लामखुट्टेको टोकाइबाट बच्नु डेङ्गु रोगबाट बच्ने एकमात्र उपाय रहेको स्वास्थ्यकर्मीहरुको सुझाव छ ।