हेटौँडा सडक विस्तार विवाद सम्बन्धी मुद्दा अदालतमा सुनुवाइको लागि पेसी तोकियो

मकवानपुर । हेटौँडा बजार क्षेत्रको सडक विस्तार विवाद सम्बन्धी मुद्दाको सुनुवाइ अन्तरिम आदेश जारी भएपछि आठौँ पटक सुनुवाइका लागि पेसी तोकिएको छ । सर्वोच्च अदालतका न्यायाधीश सपना प्रधान मल्ल र अब्दुल अजिज मुसलमानको संयुक्त इजलासमा सुनुवाइका लागि पेसी तोकिएको छ ।

यो मुद्दामा यसअघि एक पटक हेर्न नमिल्ने र ५ पटक हेर्न नभ्याइने र एक पटक मिसिल कागजात झिकाउने आदेश जारी गरेको थियो । राष्ट्रिय स्वतन्त्र पार्टी (रास्वपा) नेतृ एवम् पूर्व सांसद विन्दवासिनी कंसाकारसहित ६ जनाले रिट दिएका थिए ।

डिभिजन सडक कार्यालय हेटौँडा, हेटौँडा उपमहानगरपालिका,जिल्ला प्रशासन कार्यालय मकवानपुर लगायतका निकायहरूले सडक विस्तार गर्ने प्रक्रिया अघि बढाएपछि सम्पत्तिको अधिकार र मुआब्जाको माग गर्दै मङ्सिर १६ मा स्थानीयहरू सर्वोच्च पुगेका थिए । सडक विभाग, सहरी विकास मन्त्रालय र भौतिक पूर्वाधार तथा यातायात मन्त्रालयलाई समेत विपक्षी बनाएर दायर गरेको रिटमा सर्वोच्चले मङ्सिर ९ गते अल्पकालीन अन्तरिम आदेश जारी गरेको थियो ।

उक्त मुद्दामा मङ्सिर २६ मा पेसी तोक्दै न्यायाधीश मेघराज पोखरेलको इजलासले विपक्षीका नाममा कारण देखाऊ आदेश जारी गर्दै अल्पकालीन अन्तरिम आदेश समेत दिएको थियो । मङ्सिर २६ गते न्यायाधीश कुमार रेग्मी र महेश शर्मा पौडेलको इजलासले अन्य आदेश ‘मिसिल झिकाउने आदेश’ जारी गरेको थियो ।