दर्ता नवीकरण नगरेका मकवानपुरका ४० बढी औषधि पसल बन्द गर्न प्रशासनको निर्देशन

मकवानपुर । जिल्ला प्रशासन कार्यालय मकवानपुरले दर्ता नविकरण नभएका ४० बढी औषधी तथा फार्मेसी पसलहरु बन्द गर्न निर्देशन दिएको छ । औषधि व्यवस्था विभागले तोकिएको समयसीमाभित्र नवीकरण नगरेका मकवानपुरका ४० भन्दा बढी औषधि पसलहरु पनि बन्द गर्ने प्रशासन कार्यालयले निर्देशन दिएको हो ।

बुधबार एक सूचना जारी गर्दै कार्यालयले देशभरका ५ हजार ३०२ वटा औषधि पसलहरूको सञ्चालन प्रमाणपत्र (अनुमति) रद्द गरिएको र उक्त निर्णय अनुसार मकवानपुरका ४० बढी औषधी तथा फार्मेसी पसल दर्ता नविकरण नरहेकाले बन्द गर्न सूचित गरेको हो । दर्ता खारेज भएका उक्त औषधि पसलहरूलाई आजैका मितिदेखि आफ्नो कारोबार पूर्ण रुपमा बन्द गर्न प्रशासन कार्यालयको निर्देशन रहेको छ ।

औषधि व्यवस्था विभाग, बिजुलीबजारले गत असार २ गते सार्वजनिक सूचना जारी गर्दै कानुनी अवधिभित्र नवीकरण प्रक्रिया पूरा नगरेका अनुज्ञापत्र, सिफारिसपत्र तथा अन्य सम्बन्धित प्रमाणपत्रहरु स्वतः रद्द भएको स्पष्ट पारेको थियो । उक्त निर्णय कार्यानवयन गर्दै जिल्ला प्रशासन कार्यालय मकवानपुरले दर्ता खारेज भएका फार्मेसी, भेट (पशु) फर्मा र आयुर्वेद फर्माहरु बन्द गर्न निर्देशन गरेको हो ।

प्रशासकीय अधिकृत गुणराज प्रसाद न्यौपानेका अनुसार तोकिएको कानुनी अवधिभित्र नवीकरण नगरेका कारण प्रावधान अनुसार नै ती पसलहरुको दर्ता स्वतः खारेज भएको हो । सूचनाको उल्लंघन गरी व्यवसाय सञ्चालन गरिरहेको पाइएमा प्रचलित कानुन बमोजिम कारबाही गरिने समेत उहाँले बताउनुभयो ।